الأحد، 5 يونيو 2011

أصلك يا مصر أمى

أصلك يا مصر أمى

يا مصر أنا ابنك ..
راجعلك .. 
أنا محمد وأحمد ومينا ووليد

أنا ابن أرضك سَمَاكِ ..
جبالك سهولك ..
والوادى الجديد

أنا ابنك حبيبك ..
أنا ابن سينا وابن بحرى ..
وابنك فى الصعيد



ثمثال أم البطل بمدينة أسيوط

بدَأِتْ حياتى برضعة من نيلك ..
وعايش بمَيِّته اللى لِسَّه بتجرى جوَّه الوريد

راجعلك عشانك ..
عشان ولادك..        
اللى عاش منهم فى أرضك واللى مسافر بعيد

جىّ آخد بإيدك ..
وعلى كتفى أشيلك ..    
قرآنك فى قلبى , وبعنية شايف عهدك جديد

يا أمى يا غالية .. 
وفوق راسى عالية ..   
دمّى فداك , وبروحى أجود

فى شرقك فى غربك ..
شمالك جنوبك ..
واقفلك مرابط قدام الحدود

ومعنديش مشاكل ..
أحارب واشاكل ..
فدا ترابك .. اللى اتغطى بيه لما أبقى شهيد

وميهمنيش افتكرنى حدّ أو نسينى ..
أو محدش جه يحطّ على قبرى الورود

أصلك يا مصر أمى ..
أرض أبويا وأمى ..
دانتى أرض جدى وجد الجدود


ولو مرة زعلت ..
ومع أخويا اختلفت..
أرضك بتجمعنا .. ولحضنك نعود

زمان بنينا سد عالى ..
وآدى احنا جاهزين نعلّى ..
ألف غيره م السدود

مبانى وصناعة ..
تجارة وزراعة ..
خيرك لأهلك .. ولكل الوجود

جاهزين نعيدلك ..
يا أمى مجدك ..
ونخلدك خلود .. فوق الخلود

محمد نبيل

هناك 4 تعليقات:

  1. جميل ما كتبت عن بلدك ، و اجمل ان تجد بمن يحب
    بلده فوق الضنون و يشيد بها في كل مكان
    حفظ الله لكم مصر
    سلامي

    ردحذف
  2. أخى
    وأنتم والله بلد الشهداء الذين لم ولن نسساهم , وسنظل نفخر بهم وبكل من يأتون من بعدهم من كل أبناء وطننا العربى الكبير.

    أشكرك

    ردحذف
  3. جاهزين نعيدلك ..
    يا أمى مجدك ..
    ونخلدك خلود .. فوق الخلود

    مفيش اغلا من ترابها ولا ناسها الطيبين
    اللي شربوا من نيلها وصبروا علي حكام ظالمين
    ومن غير تمن يفدوها بحياتهم وبكل غالي وثمين
    مصر الحضارة والعفة والاصالة من سنين
    بحبك يابلادى وترابك فوق الجبين

    دول بيتين كملت بيهم خاطرتي (بحبك يا مصر)


    جميل ماسطرت وجميل هو احساسك
    دمت بكل خير وود
    تحياتي
    زهرة

    ردحذف
  4. مفيش اغلا من ترابها ولا ناسها الطيبين
    اللي شربوا من نيلها وصبروا علي حكام ظالمين
    ومن غير تمن يفدوها بحياتهم وبكل غالي وثمين
    مصر الحضارة والعفة والاصالة من سنين
    بحبك يابلادى وترابك فوق الجبين

    أبيات جميلة أكملت بها ما اعترى أبياتى من نقص فاكتمل البنيان.

    ألف شكر زهرة

    ردحذف

ليس أجمل من زيارتك الكريمة .. سوى تفضلك بالتعليق
فهذا مما تزداد به أُخوتنا فى الله .. والعمل لما فيه رضاه